ក្នុងព្រះពុទ្ធសាសនា ព្រះត្រៃបិដក ជាកំណប់ ជាខ្លឹម ឬជាគោលព្រះធម៌ ដែលជាធម៌រៀនសូត្រ ឬជាអរិយត្តិធម៌ដ៏ប្រសើរបំផុត ។ ខ្ញុំមានចិត្តប្រាថ្នាចង់ឃើញ ចង់ស្គាល់ឲ្យជាក់ភ្នែកនូវអរិយត្តិធម៌ដ៏ឧត្ដមនេះជាពន់ពេក ដោយតាមរកនៅតាមបណ្ណាគារនានា តែមិនប្រទះឃើញសោះ ។ ទើបម្សិលមិញនេះ ខ្ញុំបានទៅពុទ្ធសាសនបណ្ឌិត្យ ក្នុងបំណងរកមើលសៀវភៅវិសុទ្ធិមគ្គប្រែផង តែមិនបានឃើញមានសៀវភៅវិសុទ្ធិមគ្គប្រែ, មានតែក្នុងភាសាបាលី តែខ្ញុំបានឃើញព្រះត្រៃបិដកដែលមានចំនួន ១១០ ក្បាល ។ ខ្ញុំពុំធ្លាប់ដឹងថាព្រះត្រៃបិដកមានរហូតដល់ ១១០ ក្បាលដូច្នេះទេ គឺសរុបទាំងអស់មានជាងបួនម៉ឺនទំព័រ ។
កាលដើមឡើយ ខ្ញុំស្រមៃថាគម្ពីរនេះប្រហែលមានត្រឹមមួយក្បាល ឬពីរក្បាល និងមានកម្រាស់ក្រាស់, មិនស្មានថាច្រើនក្បាលដូច្នោះទេ ។ ប្រការនេះខ្ញុំកោតសរសើរដល់ក្រុមជំនំបកប្រែព្រះត្រៃបិដកបាលីនេះជាអនេក ។ ប្រយោជន៍នៃការបកប្រែនេះធំធេងណាស់ មិនអាចកាត់ថ្លៃឡើយ ដែលអាចឲ្យខ្មែរបានឃើញធម៌ពិត (សច្ចធម៌) បានស្គាល់នូវអរិយត្តិធម៌ ដែលជាគោមប្រទីបបង្ហាញផ្លូវទៅរកសេចក្ដីក្សេមក្សាន្ត បានឃើញនូវការណ៍ពិត ស្គាល់ល្អអាក្រក់ ។ល ។
បើតាមប្រសាសន៍លោក ប៊ុន្នីន, បណ្ណារក្សពុទ្ធសាសនបណ្ឌិត្យ ថាព្រះត្រៃបិដកខ្មែរ ជាព្រះត្រៃបិដកដែលបានបកប្រែពីបាលីចប់ជាស្ថាពរមុនគេបង្អស់ក្នុងលោក ហើយន័យសេចក្ដីមិនឃ្លាតចាកអំពីព្រះត្រៃបិដកបាលីឡើយ គឺស្មើគ្នាត្រឹមនឹងព្រះត្រៃបិដកបាលី ។ ព្រះត្រៃបិដកថៃវិញ គេបកប្រែ និងសម្រាយឲ្យងាយយល់ ហើយបំព្រួញនៅត្រឹមជាងសែសិបក្បាលប៉ុណ្ណោះ ។ ធ្វើបែបនោះក៏ល្អ អាចឲ្យអានទៅងាយចូលចិត្តបាន ប៉ុន្តែបើចង់ផ្ទៀងរកសេចក្ដីដើមឲ្យត្រឹមត្រូវគង់នឹងមានការលំបាក ។
កិច្ចបកប្រែព្រះត្រៃបិដកខ្មែរចាប់ផ្ដើមពីឆ្នាំ ១៩៣០ ដល់ឆ្នាំ ១៩៦៨ គឺចំណាយពេលអស់ ៣៩ ឆ្នាំទើបចប់សព្វគ្រប់ ។ ការនោះកើតឡើងដោយមានការចាត់តាំងពីព្រះបាទសម្ដេចព្រះស៊ីសុវត្ថិមុនីវង្ស ចមចក្រពង្ស ហរិរាជបរមិន្ធរភូវណៃក្រៃកែវហ្វាសុឡាឡៃ ព្រះចៅក្រុងកម្ពុជាធិបតីជាអម្ចាស់ជីវិតលើត្បូង ចាត់ក្រុមជំនំដែលមានសមាជិកជាង ៣០ នាក់ ឲ្យធ្វើការនេះលុះសម្រេច ។
ខ្ញុំជឿដោយប្រាកដ ថាការអានព្រះត្រៃបិដកនឹងនាំឲ្យកើតសេចក្ដីក្សេមក្សាន្ត ស្គាល់ការណ៍ពិត លែងវង្វេងដោយការបំភាន់នៃកិលេស ។ ការណ៍ដែលខ្ញុំហ៊ានថាដូច្នេះ ដោយខ្ញុំបានស្គាល់ពាក្យទេសនារបស់ព្រះពុទ្ធជាអម្ចាស់ខ្លះៗតាមរយៈសៀវភៅមួយចំនួនរួចហើយ ។ ខ្ញុំនឹងតាំងចិត្តអានលុះចប់ ១១០ ក្បាលត្រាតែបាន ។
សម្រាប់ខ្មែរ 
ពេលអានចប់ កុំភ្លេចជួយនិទានបន្តឲ្យស្ដាប់ផង។
ខ្ញុំនឹងរកកលផ្សព្វផ្សាយជូនគ្រប់គ្នា ។
សុទ្ធតែរកកល 😀
កលគឺឧបាយ ។ ប្រើអ៊ីចឹងត្រូវទេ ?
Boeun, you might find this book interesting http://www.buddhanet.net/pdf_file/tipitaka.pdf. Cheer!
អរគុណ ! តែភាសាអង់គ្លេស ខ្ញុំអានមិនយល់ទេ ។
សង្ខេបប្រាប់ក្នុងប្លក់ផង
បាទ
Hi Boeun, you can find the electronic copies of the 110 books of Tripitaka or Tipitaka in Khmer at http://dhamma4khmer2.org/tipitaka_vol_1.htm. And these are the audio books of the first 62 books. Anumodana!
Audio books: http://dhamma4khmer2.org/tipitaka-reading.htm
អរគុណណាស់លោកគ្រូ! មិនស្មានថាមានទាំងសំឡេងដូច្នេះទេ ។ តែសៀវភៅនោះមិនច្បាស់ ពិបាកមើលដែរ តែប្រសើរជាងអត់ ។
អៃយ៉ា បឿន ចង់ក្លាយជាអាចារ្យ ព្រះត្រៃបិដក ហើយនៀក! ខ្ញុំចង់អាន អោយចប់ដែរក្នុងរយៈពេលមួយឆ្នាំ តែមិនអាចទៅរួចទេ មើលទៅ ពីព្រោះ រវល់ពេក គឺអានបាន ៤ ក្បាល និងក្បាលទី ៥ បានពាក់កណ្តាល រឿងភិក្ខុនី ក៏នៅមេម៉ាយត្រឹមហ្នឹងទៅ ដោយសាររវល់ពេក ហើយសព្វ ថ្ងៃអត់មានភិក្ខុនីផង ។ បើពិនិត្យមើលទៅ ការបកប្រែពិស្តារឿងពិត គឺវែងចឹងឯង ដោយមាន ប្រយោគឬឃ្លាដដែលៗច្រើនណាស់ ដោយខុសគ្នាតែពាក្យពីរបីម៉ាត់ ចឹងបើគេបកប្រែសង្ខេប វាម្យ៉ាងដែរ ។ ខ្ញុំបានកំណត់ខ្លួនឯងថា អានមួយ ខែអោយបានដប់ (១០) ក្បាលទើបចប់ ១១០ ក្បាលក្នុងរយលពេល មួយឆ្នាំ ។ល។ សូមអរគុណ ដែលបានលើករឿងគម្ពីរព្រះត្រៃបិដកនេះ មកបរិយាយ គឺល្អណាស់ សូមសា្វគមន៍និងចូលរួម ពិភាក្សា ។
ខ្ញុំមិនប្រាថ្នាដល់សម្បត្តិអាចារ្យទេ តែប្រាថ្នាដល់សម្បត្តិសួគ៌ ឬ និព្វាន និងចង់ឲ្យខ្លួនបានក្សេមក្សាន្ត រួចចាកផុតទុក្ខក្នុងជាតិនេះផង និងបានជាបញ្ញាផង ។
លោក ហួន ថៃឡុង គាត់អានក្នុងមួយថ្ងៃ ១០ ម៉ោងយ៉ាងតិច រយៈពេល ៦ ខែ អានចប់ ១១០ ក្បាល ។ ទាល់តែកំណត់យ៉ាងមាំដូច្នោះ ទើបអាចអានចប់ ។
ឥឡូវដូចចាប់អារម្មណ៍ធម៌ប្លែក! o.O តិចចង់ទៅបួសចោលប្រពន្ធកូន ដូចព្រះវេស្សន្តររ៉ូវ! ហេសហេសហេសនិយាយលេងរ៉េ ។ ចង់ឃើញអាហ្នឹងម៉េចមិនសួរ? នៅក្នុងវត្តគេតំកល់សឹងគ្រប់កុដិលោកហ្នឹង! ដាក់ពេញ១ទូប៊ឹបណ៎!
រៀនធម៌ មិនបាច់ទៅបួសក៏បាន ។ ខ្ញុំក៏ដឹងថានៅវត្តមានដែរ ព្រោះបានជួបសួរព្រះសង្ឃ ប៉ុន្តែមិនមានពេលបានទៅវត្ត ។
៦ ខែចប់ ១១០ ក្បាល មួយក្បាល ៤០០ -៥០០ ទំព័រ ដូចលឿនពេកដឹង ! ខ្ញុំអានយឺតបន្តិច ព្រោះខ្ញុំចូលចិត្តពិចារណា រកហេតុផល កន្លែងខ្លះមើលហើយមើលទៀត ហើយកត់ទុកនូវ ចំណុចសំខាន់ៗផង ដាក់ទាំងម៉ោង ថ្ងៃខែឆ្នាំ និងទំព័រនិងវគ្គនិមួយៗទៀត មិចង់អោយខាតពេល បំរុងនឹងសរសេរជាសៀវភៅសង្ខេបផង ហើយចង់ភ្ជាប់ រឿងនយោបាយរបស់ខ្ញុំ ទៅនឹងរឿងព្រះពុទ្ធផង ពីព្រោះសិក្សាស្រាវជ្រាវទៅ វាចូលធ្លុងច្រើនដែរ នឹងអំពើបុណ្យបាប និងការត្រាស់ដឹងរបស់ព្រះអង្គ ហើយមិនមែនសិក្សាតែ ពុទ្ធសាសនាទេ តែគ្រឹស្ទាន ហិណ្ឌូ និងឥស្លាមផងដែរ ហើយសព្វថ្ងៃនេះ បានយល់ច្បាស់ ហើយមូលហេតុដែលនាំអោយកើតសាសនា ! …៚
http://khmerbuddhism.net/ ក្នុងនេះមានច្រើនទៀតបង!
គាត់អាន និងបានសង្ខេបទុកមកទៀតផង ។ ខ្ញុំបានឃើញសេចក្ដីសង្ខេបនោះដែរ ។ បើលោកបានដឹងទូលាយដូច្នេះ គួរសរសេរចែកឲ្យខ្ញុំបានដឹងផងមក ។
ឧត្ដម៖ អរគុណប្អូនឧត្ដម, កំពុងមើល 😀
ពិតណាស់កំពុងតែសរសេរហ្នឹងឯង ឥឡូវនេះកំពុងសិក្សាស៊ីជម្រៅ អំពីអដ្ឋង្គិក ៨ ប្រការ និងអរិយសច្ចៈ ៤ ទាំងភាសារខ្មែរនិងអង្គ្លេស ថ្ងៃមុនសាកល្បងជួយសរសេរ Project អោយកូនក្មេង នូវរឿងសង្ខេប របស់ព្រះពុទ្ធនិងខ្លឹមសារ អដ្ឋង្គិកមគ្គ ៨ និង អរិយសច្ច ៤ ដោយក្នុង សៀវភៅដែលរដ្ឋគេយកបង្រៀនកូនក្មេង និយាយមិនសូវល្អ ឬនិយាយ មិនសូវអោយតម្លៃក៏ថាបាន ។ ខ្ញុំអត់និយាយលេងទេ ខ្ញុំអោយតម្លៃពុទ្ធសាសនាខ្លាំងជាងគេ ហើយហ៊ានភ្ជាប់រឿង នយោបាយទៅនឹងកម្មផល ។ល។
ខ្ញុំជឿ ! ព្រោះអ្វីដែលព្រះពុទ្ធបានសម្ដែង ប្រកបដោយសច្ចធម៌ពិតមែន យើងអាចពិចារណាឃើញច្បាស់ដោយបញ្ញាខ្លួនឯង ។
ខ្ញុំរង់ចាំអានអត្ថបទរបស់លោក ។
រងចាំអានអត្ថបទ, ប្រហែលជាយូរបន្តិចហើយ ! ពីព្រោះមិនមានគ្នា ដូចលោកបឿនទេ ។ ម្នាក់ឯងចឹងឯង !
គួររកគ្នាឲ្យបានដូចខ្ញុំចុះអ៊ីចឹង កុំឲ្យច្រណែននឹងខ្ញុំ ។ (និយាយលេងទេ)
ជួយថែរផងណា!
ជួយថែអីដែរ Sopheak?
ចង់អានព្រះត្រៃបីដកជាភាសាខ្មែរ ច្បាស់ល្អ ដោយមិនពិបាកអាន សូមចូល ទៅគេហទំព័រនេះ ៖ http://www.watkhemararatanaram.org/library.php
មានសៀវភៅល្អៗច្រើនទៀតនៅគេហទំព័រនេះ។ កុំភ្លេចចូលអានណា !
ថែរព្រះត្រៃបិដកនោះណា!
😀
វ៉ិបសាយ http://watkhemararatanaram.org/tipitaka/viney_beidok_01b.php
មានវាយអក្សរព្រះត្រៃបិដកដាក់ ONLINE.
អរគុណ !
សូមអរគុណដ៏ជ្រៀលជ្រៅ បងបឿន ចំពោះការគាំទ្រ ព្រះពុទ្ធសាសនា។
បាទ អរគុណ 🙂