ព្រហាមថ្ងៃពុធ ទីដប់បួនគត់ ក្នុងខែមេសា
ត្រូវបានកំណត់ តាមក្បួនហោរា កំណត់ចារថា
ពេលចូលឆ្នាំថ្មី ។
ឆ្នាំខាលទោស័ក ព្រលឹមត្រជាក់ ចូលដល់សិរី
នៅម៉ោងប្រាំពីរ សាមប្រាំមួយនៃ ជាពេលសួស្ដី
ដល់រដ្ឋប្រជា ។
មានទេពធីតា រូបល្អថ្លៃថ្លា ព្រះនាមមណ្ឌា
គឺជាបុត្រី កបិលព្រហ្មា ចូលមករក្សា
គ្រប់គ្រងដែនដី ។
គ្រងដោយអម្ពរ គឺអនដោយពណ៌ បវរល្អក្រៃ
នៅឯព្រះកាណ៍ បុប្ផាពណ្ណរាយ ចម្ប៉ាសព្វសាយ
គន្ធាពិសិដ្ឋ ។
នៅព្រះហស្តឆ្វេង ឈើច្រត់នោះឯង សែនល្អវិចិត្រ
ខាងស្ដាំទ្រង់ម្ជុល ដ៏ល្អប្រណិត នៅកសម្អិត
ដោយកែវពិទូរ្យ ។
យកគទ្រភៈ ជាពាហនៈ គង់ឆ្លងជម្ពូ
សោយទឹកដោះស្រស់ តាមការគន់គូរ មានមកជាយូរ
តាំងពីបុរាណ ។
នាំទេពធីតា ដង្ហែសិរសា ហោះឆ្ពោះទៅកាន់
ធម្មមាលី ទីព្រៃស្មសាន ក្នុងខែត្រហិមពាន្ត
ភ្នំព្រះសុមេរុ៍ ។
ហែរប្រទក្សិណ បានមួយជុំសិន ទើបនាំដង្ហែ
វិលមកទីដើម តាមពាក្យផ្ដាំផ្ដែ មហាព្រហ្មី
កាលនៅជន្មា ។
ក្បួនស្រេចកាលណា ទើបអស់ទេវតា ចូលស្រង់គង្គា
ក្នុងមហាស្រះ ដ៏ធំមហិមា ស្រង់ស្រេចកាលណា
រក្សាសិលប្រាំ ។
តម្រាបុរាណ ចារតាមលំអាន នៃបុណ្យចូលឆ្នាំ
ឲ្យអស់ប្រជា គោរពប្រចាំ ត្រូវកត់ចំណាំ
តដល់កូនចៅ ៕
ដោយ ទឹម បឿន
១០ មេសា ២០១០
អម្ពរ (ន) សំពត់
អន (គុ) ស្រគំ (ពណ៌)
កាណ៌ (ន) ត្រចៀក
ពិទូរ្យ (ន) ពេជ្រភ្នែកឆ្មារ
គទ្រភៈ (ន) សត្វលា
សម្រាប់ខ្មែរ 
យីពូកែតែងមែនល្បង!!!! 100% 😀
បាទ អរគុណ!
សូមសរសើរ! ពូកែមែន!
សួស្តីឆ្នាំថ្មី សូមមានសិរីសួស្តីជ័យមង្គលវិបុលសុខគ្រប់ប្រការ
It is a nice photo. Can I have it on my blog too? 🙂
សត្វលា ជាសត្វមិនសូវស្វាហាប់ដូចសេះទេ ឆ្នាំនេះរាល់កិច្ចការទាំងឡាយតោងចេះប្រុងប្រយ័ត្នឲ្យបានម៉ត់ចត់ផង… ដូចជាការសម្រេចការអ្វីធ្វើដោយប្រាជ្ញាចិត្តគំនិត ទើបទេពធីតាឆ្នាំនេះទ្រង់កាន់ម្ជុលនិងឈើច្រត់ វាពុំស្ដែងពីការប្រើអាវុធយុទ្ធភ័ណ្ឌដ៏គ្រោះថ្នាក់ឡើយ ។ ការសោយទឹកដោះស្រស់កម្រណាស់ ខុសពីការសោយឈាមរបស់ទេវតាឆ្នាំទៅ ឆ្នាំផលក្នុងស្រុកនឹងអាចលក់បានកម្រៃខ្ពល់តាមតម្រា…
ចម្លែកឆ្នាំនេះទេពធីតាឈរលើពាហនៈ!
ដូចជាមិនសូវស្រួលទេដឹង ខ្លាដេញសេះ?
ដៃកាន់ម្ជុល ប្រហែលជាស្រុកខ្មែរយើង មានជោគជ័យច្រើន ខាងវិស័យកាត់ដេរហើយមើលទៅ!
កាន់ឈើច្រត់ ប្រហែលចាស់ៗ អាត្រែតច្រើនហើយមើលទៅ ហើយទុកការងារឱ្យកូនចៅក្មេងៗធ្វើម្តង!
បឿនប្រសប់តែង កំណាព្យមែន!
សូមរិទ្ធីបារមីឆ្នាំថ្មី ចូរមានដល់យើងជាខ្មែរទាំងអស់គ្នា កុំបីខានឡើយ!
សូស្ដីឆ្នាំថ្មី! ជួនពរអ្នករាល់គ្នាមានសុខភាពល្អ!
សួស្តីឆ្នាំថ្មី!សូមប្រសិទ្ធិពរជ័យសិរីមង្គលគ្រប់ប្រការជូនដល់គ្រប់ៗគ្នា
សូមមើលរូបភាពហ្ន៎! ទោះបីសត្វលាមិនសូវស្វាហាប់ដូចសេះក៏ដោយ
ក៏ខំប្រឹងរត់ឲ្យស្វាហាប់ដែរព្រោះអីសត្វខ្លាដេញតាមកៀកជាប់ពីក្រោយ…
បងដឹងថាចូលឆ្នាំនៅថ្ងៃពុធវេលាម៉ោងប៉ុន្មានទេ?
ពិរោះគ្រាន់បើដែរតើ បងប្រុស ពិតជាមានទេព្យកោសល និង ពិតជាកូនខ្មែរពិតប្រាកដមែន ដែលមានលទ្ធភាពអាចថែរក្សា មរតកខ្មែរ ជាខ្លួន បាន ប្អូនសូមកោតសរសើរដោយស្មោះ ។។
សូមអរគុណ
ពិទូរ្យ (ន) ពេជ្រភ្នែកឆ្មារ សុំសួរបន្តិច ចុះត្បូងបុស្សាខាំ ជាប្រភេទអ្វី?
សួស្តីឆ្នាំថ្មី !
សួស្តីឆ្នាំថ្មីបឿន! ជូនពរឲ្យសមដូចបំណងប្រាថ្នាគ្រប់រឿងដែលប៉ង!
ឆ្នាំខាលហេតុអីក៏មានទេវតាជិ់ះសេះ? ដូចជាឆ្ងល់ណាស់ខ្ញុំ
ទេវតាវង្វែងគណបក្ស
ទើបតែថ្ងៃនេះបានមកមើលប្លកវិញ អរគុណអ្នកទាំងអស់គ្នា ជូនពរឲ្យជួបតែសុខ ធ្វើការងារបានល្អប្រសើរ មានគេគោរពរាប់អាន បើរកស៊ី សូមឲ្យមានបាន ។
បានរូបមកពីណាពូបឿន ចែកចាយប្រើហង!
សុំអាធំ 😀
ក្រ័ត្ននឹងដឹងអែងចេះវិភាគអីដែររ៉េ 😛
មកយកម៉ោ! មិនដឹងផ្ញើទៅលោកភាក់ឯងតាមណាទេឥឡូវ!
ពូកែតែងមែនណ!