លោកអ្នកកើតឆ្នាំកុរ ៖ ពង្សមនុស្សស្រី នាមជាសត្វជ្រូក ធាតុទឹក អង្សាកំណើត នៅថ្ងៃព្រហស្បតិ៍ សិរីធ្លាក់មកពីជើងឆ្វេង របស់ព្រះព្រហ្ម មូលព្រលឹងនៅនឹងគុម្ពឈូក ឬផ្កាឈូក ។
លោកអ្នកកើតឆ្នាំនេះគួរយកផ្កាឈូកបូជាព្រះ រាល់ថ្ងៃកំណើត ខែកំណើត និងឆ្នាំកំណើតរបស់ខ្លួន ទើបបាន សមសេចក្ដីប្រាថ្នា មានជោគជ័យ និងរស់នៅត្រជាក់ជាសុខ។ មនុស្សកើតឆ្នាំនេះ រមែងជាមនុស្សមាន វាសនាពីអតីតជាតិមានគំនិតនិងប្រាជ្ញាខ្ពង់ខ្ពស់ ស្រឡាញ់សភាពស្ងប់ស្ងាត់ និយាយស្ដីតិច ចូលចិត្ដដេក ច្រើនដូចសត្វជ្រូក។ ចិត្ដធ្ងន់ បើមានក្រេវក្រោធកើតឡើងហើយនឹងចងគំនុំជាប់ក្នុងដួងចិត្ដ ។ ជាមនុស្ស ចូលចិត្ដគិតច្រើនមាននិស្ស័យនឹងនរ មិនទទឹសទទាស មានមិត្ដភក្ដិច្រើន ធ្វើការងារច្រើនបានជាមេគេ ដោយសារគំនិតប្រាជ្ញារបស់ខ្លួនមានសេចក្ដីស្នេហានឹងនរ ជាមនុស្សលាក់គំនួចតែប្រច័ណ្ឌច្រើន ។ មុខរបរ ឬការងារដែលសមនឹងខ្សែជីវិតរបស់មនុស្សកើតឆ្នាំនេះ ឱ្យចម្រើនរុងរឿងលូតលាស់ត្រូវនឹងសម្លោករបស់ ខ្លួននោះគឺធ្វើជំនួញប្រែបានទៅជាអ្នកមានទ្រព្យសម្បត្ដិស្ដុកស្ដម្ភ។ បើធ្វើរាជការ មិនសូវជាល្អប៉ុន្មានទេ ច្រើនតែត្រូវទទួលបានទោសទណ្ឌ ឬត្រូវទទួលបានការច្រណែនឈ្នានីស ពុំសូវមានសេចក្ដីសុខចម្រើនក្នុង ជីវិតឡើយ ពុំនោះទេជាអ្នកប្រកបដោយរោគច្រើន ។
ពាក្យព្យាករណ៍អ្នកកើតឆ្នាំកុរ
ពីអាយុ ៦ឆ្នាំ ដល់៨០ឆ្នាំ ៖ បុរស អាយុ ៖ ៧, ១២, ១៩, ២៤, ៣១, ៣៦, ៤៣, ៤៨, ៥៥, ៦០, ៦៧, ៧២, ៧៩, ៨៤ ឆ្នាំ និងស្ដ្រីអាយុ ៖ ១២, ១៧, ២៤, ២៩, ៣៦, ៤១, ៤៨, ៥៣, ៦០, ៦៥, ៧២, ៧៧, ៨៤ឆ្នាំ ។ ទំនាយថា ៖ ជាឆ្នាំនាំមកនូវជោគលាភសក្ការៈគិតប្រកបការងារអ្វីៗតែងតែបានសម្រេច ដូចសេចក្ដីប្រាថ្នាគ្រប់ប្រការ ដែលអាចចែកចេញបានដូចតទៅនេះ ៖
ជោគលាភ ៖ នឹងបានទ្រព្យសម្បត្ដិលុយកាក់មាសប្រាក់ និងវត្ថុមានតម្លៃ គ្រឿងប្រដាប់លម្អគេហដ្ឋាន ដីធ្លីបានឡើងប្រាក់ខែ និងប្រាក់បំណាច់រង្វាន់ផ្សេងៗទៀត ។
កិត្ដិយស ៖ ការសិក្សានឹងបានប្រឡងជាប់ដូចសេចក្ដីប្រាថ្នា បើនៅទំនេរនឹងបានការងារធ្វើ បើមាន ការងារធ្វើស្រាប់ហើយ បានឡើងកាន់មុខតំណែងខ្ពស់ឡើង ។
កេរ្ដិ៍ឈ្មោះ ៖ នឹងបានទទួលសេចក្ដីនិយមរាប់អាន លើកតម្កើងមុខមាត់ពីមនុស្សក្នុងមជ្ឈដ្ឋានការងារ ឬនៅក្នុងផ្ទះជាទីពេញចិត្ដ ដល់ខ្លួនឯង និងអ្នកដទៃ ។
សេចក្ដីសុខ ៖ បានជួបប្រទះនឹងសេចក្ដីស្នេហ៍បរិសុទ្ធ ឯអ្នកដែលមានគូគ្រងហើយនឹងមានបុត្រជាទី ស្រលាញ់ពេញចិត្ដ សេចក្ដីសុខសប្បាយទ្វេឡើងថែមទៀត ។ បុរសអាយុ ៖ ៣៦, ៤៣,៤៨, ៦០ឆ្នាំ និងស្ដ្រីអាយុ ៖ ២៩, ៣៦, ៤៨ឆ្នាំ ។ ទំនាយថា ៖ បើរៀបអាពាហ៍ពិពាហ៍ហើយនឹងមានកូន បើនៅលីវ នឹងបានរួមរ័កអភិរម្យសមសេចក្ដីបំណងប៉ងប្រាថ្នា ឬបានទទួលលាភសក្ការៈជាវត្ថុមានជីវិតផ្សេងៗទៀត ចូលមកនៅក្នុងផ្ទះ ។ បុរសអាយុ ៖ ១១, ២០, ២៣, ៣២, ៣៥, ៤៤, ៤៧, ៥៦, ៥៩, ៦៨, ៧១, ៨០, ៨៣ឆ្នាំ និងស្ដ្រីអាយុ ៖ ៧, ១០, ១៩, ២២, ៣១, ៣៤, ៤៣, ៤៦, ៥៥, ៥៨, ៦៧, ៧០, ៧៩ ឆ្នាំ ។ ទំនាយថា ៖ ជាឆ្នាំនាំមកនូវគ្រោះកាច ឱ្យប្រញាប់ប្រុងប្រយ័ត្នខ្លួន ដែលអាចចែកចេញបានដូចតទៅនេះ ៖
១-ជួបប្រទះរឿងទុក្ខសោកខូចចិត្ដ ដោយត្រូវពួកសត្រូវក្រុមពាលទាំងឡាយប៉ុនប៉ងព្យាបាទ កុំធ្វើដំណើរ ទៅទីស្ងាត់និងពេលរាត្រី ព្រោះនឹងត្រូវចោរឃ្មួយគំរាមកំហែង។
២-រោគាព្យាធិបៀតបៀនកាយ សត្វអាសិរ្ពិសទិចឬខាំ ធ្វើឱ្យអស់សេចក្ដីសុខ ។
៣-លុយកាក់ត្រូវចំណាយច្រើនទាំងក្នុងផ្លូវដែលមិនចាំបាច់ បើធ្វើជំនួញជួញប្រែនឹងត្រូវខាតដើមទុន។
៤-សង្ឃឹមផលប្រយោជន៍ទៅលើផ្លូវអ្វីច្រើនតែភ្លាំងភ្លាត់ ប្រាក់ចំណូលតិចជាងប្រាក់ចំណាយ ឬបានមក ហើយចាយអស់ទៅវិញ។
៥-បងប្អូនញាតិមិត្ដដែលធ្លាប់ស្រឡាញ់រាប់អានគ្នានឹងប្រែក្លាយជាសត្រូវ ។
៦-ទីលំនៅឬកន្លែងធ្វើការត្រូវផ្លាស់ប្ដូរ ឬធ្វើដំណើរទៅស្រុកឆ្ងាយ បើលោកអ្នកមិនចាកចេញទៅទេ ក៏ គង់មានមនុស្សនៅក្នុងផ្ទះចាកចេញទៅដែរ។
៧-រងទទួលសេចក្ដីយ៉ាប់យ៉ឺនលំបាកលំបិនឬនឿយហត់ ជាខ្លាំងទាល់តែមានមានៈអត់ធន់ ។
៨-ធ្វើការងារជាមួយអ្នកដទៃនឹងត្រូវគេឆបោក បងប្អូនញាតិមិត្ដស្និទ្ធស្នាល ប្រែក្លាយទៅជាសត្រូវ កន្លែង ធ្លាប់នៅនឹងត្រូវក្ដៅក្រហាយ ឬត្រូវគេបណ្ដេញចេញ ចិត្ដថ្លើមអន្ទះអន្ទែង។
បុរសអាយុ ៖ ១០, ២១, ២២, ៣៣, ៣៤, ៤៥, ៤៦, ៥៧, ៥៨, ៦៩, ៧០, ៨១, ៨២ឆ្នាំ និងស្ដ្រីអាយុ ៖ ១៤, ១៥, ២៦, ២៧, ៣៨, ៣៩, ៥០, ៥១, ៦២ ,៦៣, ៧៤, ៧៥, ៨៤ឆ្នាំ។ ទំនាយថា ៖ ឆ្នាំនេះជាឆ្នាំនៃ ប្រក្រតីកាលមិនល្អណាស់ហើយក៏មិនអាក្រក់ណាស់ណាដែរ ការសិក្សាបានត្រឹមប្រលងជាប់មិនធ្លាក់ ប្រកប ការងារបានផលល្មម បើធ្វើជំនួញជួញប្រែបានត្រឹមមិនខាតដើម។ បងប្អូនញាតិមិត្ដជិតឆ្ងាយ បើឧស្សាហ៍ ទៅមករាប់រកគ្នាទើបអាចផ្សាភ្ជាប់ចំណងសាមគ្គីបានល្អ ។ ការងារអ្វីៗអាស្រ័យដោយការព្យាយាម ហើយប្រើការពិនិត្យពិចារណាឱ្យល្អិតល្អន់ទើបអាចរផលកម្រៃបាន ។
សេចក្ដីស្នេហាត្រូវប្រើសេចក្ដីមានៈព្យាយាម ទើបសម្រេចផល នឹងអាចរឹតចំណងស្នេហារវាងគ្នានឹងគ្នា បានជាបង្គួរ គឺមិនល្អពេក ហើយក៏មិនអាក្រក់ពេក ដល់ទៅដាច់ដោចលែងលះផ្ដាច់មគ្គសង្វាសគ្នាដែរ។ បុរសអាយុ ៖ ១៥, ១៦, ២៧, ២៨, ៣៩, ៤០,៥១, ៥២, ៦៣, ៦៤, ៧៥, ៧៦, ៨៧ឆ្នាំ និងស្ដ្រីអាយុ ៖ ៩, ២០, ២១, ៣២, ៣៣, ៤៤, ៤៥, ៥៦, ៥៧, ៦៨, ៦៩, ៨០, ៨១ ឆ្នាំ ។ ទំនាយថា ៖ ឆ្នាំនេះ ជាឆ្នាំស្រមោលអន្ទោលតាមប្រាណនៅក្នុងឆ្នាំនេះ បើលោកអ្នកធ្វើល្អបានទទួលផលល្អ បើធ្វើអាក្រក់បាន អាក្រក់តបស្នងវិញយ៉ាងប្រាកដ ។
ធ្វើការងារអ្វីៗ ប្រដូចទៅនឹងស្រមោលអន្ទោលតាមប្រាណ ខុសហើយគឺត្រូវទទួលផលកម្មដោយគ្មាន ការអភ័យទោស ឬបន្ធូរបន្ថយ គ្មានផ្លូវនឹងផ្លាស់ប្ដូរកែកុន ថាធ្វើអាក្រក់ឱ្យក្លាយទៅជាល្អទៅជាអាក្រក់បាន ទេ បើទុកជាគេជួយក៏ជួយមិនរួចដែរ ។ បុរសអាយុ ៖ ១៤, ១៧, ២៦, ២៩, ៣៨, ៤១, ៥០, ៥៣, ៦២, ៦៥, ៧៤, ៧៧, ៨៦ ឆ្នាំ និងស្ដ្រីអាយុ ៖ ១៣, ១៦, ២៥, ២៨, ៣៧, ៤០, ៤៩, ៥២, ៦១, ៦៤, ៧៣, ៧៦, ៨៥ឆ្នាំ ។ ទំនាយថា ៖ ឆ្នាំនេះជាឆ្នាំមានគ្រោះថ្នាក់ធំចូរប្រយ័ត្នឱ្យមែនទែន ព្រោះហេតុ នឹងកើតឡើងជាច្រើនប្រការគឺ ៖
១-កើតហាយនៈលិចលង់ គឺត្រូវខូចខាតលុយកាក់អស់រលីងពីខ្លួន ។
២-កើតការផ្លាស់ប្ដូរ ព្រាត់ប្រាសចាកចោលគ្នា ដោយសត្រូវធ្វើទោស ឬជួបសេចក្ដីទុក្ខលំបាកឬត្រូវធ្វើ ដំណើរទៅស្រុកឆ្ងាយដោយមានហេតុចាំបាច់ ។ ចំពោះអ្នកដែលមានបំណងនឹងផ្លាស់ប្ដូរ ឬចង់ធ្វើ ដំណើររមែងបានដូចសេចក្ដីបំណង ។
៣-បងប្អូនញាតិមិត្ដជាទីស្រឡាញ់ នឹងប្រែក្លាយទៅជាសត្រូវស្អប់ខ្ពើមគ្នា ។
៤-ត្រូវគេឆបោកកេងប្រវ័ញ្ចធ្វើបាបឱ្យខូចខាត នូវរបស់ជាទីស្រឡាញ់ហួងហែងជាទីគាប់ចិត្ដ ។
៥-ត្រូវចោរលួចឬភ្លើងឆេះទទួលសេចក្ដីក្ដៅក្រហាយនិងការខកចិត្ដ ។
៦-អ្នកធ្វើការជាមួយគ្នា មានគំនិតផ្ដន្ទាឈ្នានីស ឬរង់ចាំចាប់កំហុស ជាហេតុធ្វើឱ្យទទួលទោសទណ្ឌ ធ្វើការច្រើនលើសលន់ ប៉ុន្ដែ “សេចក្ដីគូគាប់” មិនត្រូវគេបោកបញ្ឆោតទៅក្នុងផ្លូវអកុសលឡើយ។ បុរសអាយុ ៖ ១៣, ១៨, ២៥,៣០,៣៧, ៤៧,៤៩, ៥៤, ៦១, ៦៦, ៧៣, ៧៨, ៨៥ឆ្នាំ និងស្ដ្រីអាយុ ៖ ១១, ១៨, ២៣, ៣០, ៣៥, ៤២, ៤៧, ៥៤, ៥៩, ៦៦, ៧១, ៧៨,៨៣ឆ្នាំ ។ ទំនាយថា ៖ ឆ្នាំនេះជាឆ្នាំ នៃការមានជោគលាភ ប៉ុន្ដែនឹងល្អបានទៅតាមលំដាប់គឺចាប់តាំងពីដើមឆ្នាំ ចេះតែកើនទ្វេឡើងៗជាលំដាប់ រហូតដល់ ចុងឆ្នាំការសិក្សានឹងចេះតែរីកចំរើនទៅមុខបន្ដិចម្ដងៗលុះដល់ចុងឆ្នាំទើបល្អពេញបន្ទុក។
ការងារអ្វីៗប្លែកដូចគ្នាដែរ នៅដើមឆ្នាំមិនសូវមានការរីកចំរើនខ្លាំងប៉ុន្មានទេ ដល់ទៅកណ្ដាលឆ្នាំទើប ឃើញផលល្អជាមធ្យម លុះចុងឆ្នាំទើបទទួលផលពេញបរិបូណ៌ ។ ភាពរីកចម្រើននឹងឃើញបានចាប់ពីខែ ឧសភាឡើងទៅ ហើយចេះតែកើនចម្រើនតទៅជាលំដាប់រហូតពេញបរិបូណ៌ដល់ទៅចុងឆ្នាំ ។
ចងក្រងដោយលោក អ៊ឹម បុរិន្ទ គណៈ កម្មការស្រាវជ្រាវវិជ្ជាហោរាសាស្ដ្រ
និង ប្រពៃណីទំនៀមទំលាប់ខ្មែរ
ចម្លងចេញពី កាសែតកោះសន្តិភាពទាំងស្រុង ដែលច្បាប់ដើមចេញពីសៀវភៅមហាសង្ក្រាន្ត ។ ( ខ្ញុំចម្លងមកនេះដើម្បីទុកជាឯកសារ ព្រោះខ្ញុំមិនបានទិញសៀវភៅមហាសង្ក្រានសម្រាប់ចម្លងពីសៀវភៅ ផ្ទាល់ ។ )
សម្រាប់ខ្មែរ 