jump to navigation

ចាប់ផ្ដើម​កាន់​យក​សីល ៥ ថ្ងៃ​ព្រហស្បតិ៍ ទី 17 ខែវិច្ឆិកា 2011

Posted by ទឹម បឿន in ទាក់ទង​នឹង​ខ្ញុំ, អប់រំ.
3 comments

ពេលនេះ​ខ្ញុំ​បាន​ត្រៀម​ខ្លួន​​ដើម្បី​សមាទាន​សីល ៥ រួច​ជា​ស្រេច​ហើយ ។ ខ្ញុំ​​ចង់​កាន់​យក​និច្ចសីល​នេះ​ជា​បឋម និង​ឆ្ពោះ​​ទៅ​រក សីល ៨ ជា​បន្ត ។ បំណង​ដែល​ចង់​កាន់​នេះ មាន​យូរ​មក​ហើយ ប៉ុន្តែ​ខ្ញុំ​នៅ​ស្ទាក់ស្ទើរ ព្រោះ​យល់​​ថា​ឋានៈ​ជា​ឃរាវាស​នេះ ត្រូវ​​ប្រកប​ទង្វើ​ផ្សេងៗ​ដើម្បី​ចិញ្ចឹម​ជីវិត​ដោយ​មិន​អាច​វៀរចាក​អំពើ​ហាម​ឃាត់ ៥ ប្រការ​ក្នុង​សីល ៥ នោះ​បាន​ឡើយ ​ម្យ៉ាង​យល់​ថា​ពុំ​ទាន់​ដល់​ពេល​សមគួរ​សម្រាប់​ខ្ញុំ​ ។ លុះ​ក្រោយ​ៗ​មក ខ្ញុំ​បាន​សម្រេច​ចិត្ត​ព្យាយាម​បន្តិច​ម្ដង ដោយ​​ឈប់​ប៉ះពាល់​ជាតិ​សុរា ហើយ​ខ្ញុំ​ក៏​ធ្វើ​បាន​ដោយ​គ្មាន​លំបាក, ជា​បន្ទាប់​ខ្ញុំ​តាំង​ចិត្ត​មាំ​​ថា​មិន​យក​ទ្រព្យ​របស់​គេ​ដោយ​គេ​មិន​បាន​ឲ្យ​ ក៏​មិន​មែន​ជា​ការលំបាក, ការមិន​សម្លាប់​សត្វ​ក៏​ខ្ញុំ​ព្យាយាម​តាំង​ចិត្ត​ធ្វើ​បាន​បន្តិច​ម្ដងៗ, ខ្ញុំ​មិន​ធ្វើ​អំពើ​ខុសឆ្គង​ចំពោះ​ប្រពន្ធ​កូន​អ្នក​ដទៃ និង​ព្យាយាម​មិន​និយាយ​កុហក​ជា​ដើម ។ ការតាំង​ចិត្ត​ជា​រឿយៗ​នេះ ខ្ញុំ​យល់​ថា សមាទាន​សីល ៥ មិន​មែន​ជា​ការលំបាក​ទេ ហើយ​ខ្ញុំ​អាច​ធ្វើ​បាន​ក្នុង​ជីវិត​ជា​ឃរាវាស​នេះ​ដោយ​មិន​ប៉ះពាល់​ដល់​ការប្រកប​របរ​ផ្សេងៗ​ប្រចាំ​ថ្ងៃ​ផង ។ ដូច្នេះ​ខ្ញុំ​ក៏​សម្រេច​ចិត្ត​ថា​នឹង​ត្រូវ​វៀរចាក​​នូវ​អំពើ​ ៥ ប្រការ​នេះ​ចាប់​ពី​ពេល​នេះ​តទៅ ។

ពាក្យ​សីល​នេះ បើ​និយាយ​ឲ្យ​ខ្លី គឺ​ជា​ទម្លាប់​ ឬ​ជា​ចរិត​ប្រក្រតី​ធម្មតា​របស់​មនុស្ស គឺ​គេ​ធ្វើ​ទម្លាប់​​មួយ​ប្រក្រតី​ទាំង​ថ្ងៃ​ទាំង​យប់​​ខ្លួនឯង​ដោយ​ទៀង​តែ​ម្ដង ។ ចរិត​ប្រក្រតី​របស់​គេ​ដូចជា​​មិន​សម្លាប់​សត្វ មិន​លួច​ប្រពន្ធ​កូន​គេ​ជា​ដើម ។ ការ​​ប្រព្រឹត្ត​​ចរិយា​នេះ​មិន​ថា​នៅ​ចំពោះ​មុខ​គេ ឬ​កំបាំង​មុខ​ពី​គេ​នោះ​ទេ​គេ​តែង​ធ្វើ​ជា​ប្រចាំ បើ​​គេ​ធ្វើ​ខុស​ក្នុង​ពេល​ណា​នោះ មានន័យ​ថា​មនុស្ស​នោះ​អស់​សីល គឺ​អស់​ទម្លាប់​ល្អ ឬ​ប្រកាន់​ទម្លាប់​ល្អ​ពុំ​បាន ។ ដូច្នេះ​លោក​អ្នក​ដែល​ស្រឡាញ់​សេចក្ដី​សុខ ស្រឡាញ់​ចិត្ត​បរិសុទ្ធ គួរ​ចាប់ផ្ដើម​កាន់​យក​សីល​ពី​ពេល​នេះ​តទៅ កុំ​គិត​ចាំ​ដល់​ខ្លួន​ចាស់​ទើប​រក​សីល ព្រោះ​សីល​នេះ​អាច​ប្រព្រឹត្ត​បាន​ មិន​ប្រកាន់​ថា​ចាស់​ឬ​ក្មេង មាន​ក្រ ល្អ​អាក្រក់​ឡើយ ។

ហេតុ​អ្វី​វិទ្យុ​លែង​ចាក់​បរាភវសូត្រ​អ៊‍ីចឹង ថ្ងៃ សៅរ៍ ទី 17 ខែកញ្ញា 2011

Posted by ទឹម បឿន in ទាក់ទង​នឹង​ខ្ញុំ.
4 comments

ថ្ងៃនេះ​ខ្ញុំ​ក្រោក​តាំង​ពី​ម៉ោង ៥ ចាំ​ស្ដាប់​​បរាភវសូត្រ, ចុច​រាវ​​ប៉ុស្តិ៍​វិទ្យុ​ចុះ​ឡើង​ៗ​​រហូត​ដល់​ម៉ោង ៧​ព្រឹក ប៉ុន្តែ​មិន​មាន​ប៉ុស្តិ៍​វិទ្យុ​ណា​ចាក់​សោះ ឬ​គេ​ឈប់​ចាក់​ផ្សាយ បរាភវសូត្រ ? បើ​​លោកអ្នក​ដឹង​ប៉ុស្តិ៍​ណា​ចាក់ផ្សាយ សូម​ជួយ​ប្រាប់​ខ្ញុំ​ផង ។

ទិញ​សំបុត្រ​ឡាន​ត្រូវ​ដឹង ថ្ងៃ សៅរ៍ ទី 20 ខែសីហា 2011

Posted by ទឹម បឿន in ទាក់ទង​នឹង​ខ្ញុំ, ស្រុក​ខ្មែរ.
12 comments

ទិញ​សំបុត្រ​រថយន្ត​ក្រុង​រួច ត្រូវ​យក​ទៅ​កឹប ដើម្បី​ទទួល​​បាន​លុយ​មួយ​ចំនួន​មក​វិញ គឺ​ជា​រឿង​ដែល​ខ្ញុំ​មិន​ធ្លាប់​ដឹង ។

ដោយ​ព្រឹកមិញ​នេះ ខ្ញុំ​បាន​ទៅ​ទិញ​សំបុត្រ​ទៅ​ខែត្រ​ព្រះស៊ីហនុ​ចំនួន​ពីរ, សំបុត្រ​មួយ​ថ្លៃ ១៨០០០៛, ខ្ញុំ​យល់​ថា​ថ្លៃ​ពេក​ទើប​ទូរស័ព្ទ​សួរ​ប្រពន្ធ​ខ្ញុំ ព្រេាះ​គាត់​ពូកែ​ខាង​ដឹង​រឿង​ថ្លៃ​ទាំង​នេាះ ។ ប្រពន្ធ​ខ្ញុំ​ប្រាប់​ថា​ថ្លៃ​ប្រហែល ១៥០០០៛ ខ្ញុំ​ក៏​ត្រឡប់​ទៅ​សួរ​អ្នក​លក់​សំបុត្រ​វិញ, អ្នក​លក់​នេាះ​និយាយ​បែប​ខ្មេាះៗ ប្រាប់​ថា​ “គេ​លក់​តែ​ថ្លៃ​ប៉ុណ្ណឹង” រួច​ខ្ញុំ​សួរ​ម្ដង​ទៀត​ទើប​គេ​ប្រាប់​ថា “មិន​ទៅ​កឹប ហើយ​យក​លុយ​វិញ​ទៅ!” ។ ខ្ញុំ​ស្ទើរ​ហួសចិត្ត​នឹង​សម្ដី​របស់​អ្នក​លក់​សំបុត្រ​ដែរ ប៉ុន្តែ​ចេះ​តែ​នៅ​ធ្វើ​មុខ​ក្រាស់​ទៅ ក្រែង​បាន​លុយ​ខ្លះ​មក​វិញ ។ រួច​ខ្ញុំ​ក៏​ទៅ​កឹប​សំបុត្រ គេ​ហុច​​លុយ ២០០០៛ សម្រាប់​សំបុត្រ​មួយ​មក​វិញ គឺ​បាន ៤០០០៛ ខ្ញុំ​ក៏​ប្រាប់​ថា ២០០០៛ ទៀត គេ​ក៏​ដក​​លុយ​ថែម​ឲ្យ​ ។ ចុងក្រោយ​ខ្ញុំ​ចំណាយ​អស់ ១៥០០០៛ សម្រាប់​សំបុត្រ​មួយ ។

ទេាះ​ជា​ដឹង​ថា​យ៉ាង​នេះ​ក៏​ដោយ ខ្ញុំ​នៅ​តែ​សង្ស័យ មិន​យល់​អំពី​ដំណើរការ​របស់​គេ… ។

ប្ដូរ​ទៅ​មើល​កុន​រឿង Captain America ថ្ងៃ សុក្រ ទី 5 ខែសីហា 2011

Posted by ទឹម បឿន in ខ្សែ​ភាពយន្ត, ទាក់ទង​នឹង​ខ្ញុំ.
3 comments

គម្រោង​មើល​កុន​រឿង អ៊ូសៀ នៅ​រោងភាពយន្ត The Cineplex ត្រូវ​បាន​ប្ដូរ​ទៅ​មើល Captain America វិញ ព្រោះ​ជា​កុន​ 3D ។ នេះ​ជា​លើក​ទី​មួយ​ដែល​ខ្ញុំ​ចូល​មើល​កុន 3D ។ រឿង​នេះ​ល្អ​មើល​ណាស់, ឈុត​ឆាក​ខ្លះ អង្គុយ​ប្រឹង​តាម​ឡើង​រឹង​ខ្លួន ត្រង់​កន្លែង​ Roggers គប់​ខែល​មក​ចំ​អេក្រង់ អ្នក​មើល​ស្រែក​ និង​គេច​ស្ទើរ​គ្រប់​គ្នា ។ នេះ​ជា​សាច់រឿង​សង្ខេប ។

ដំណើរ​រឿង​កើត​ឡើង​ក្នុង​កំឡុង​សង្គ្រាម​លោក​លើក​ទី​ពីរ​ចូល​ដល់​​អាមេរិក ឆ្នាំ ១៩៤២Steve Rogers មាន​​កាយសម្បទា​​ស្គម​ មិន​​សម​​ក្នុង​កិច្ចការ​ជួរ​កង​ទ័ព ក៏​ស្ម័គ្រ​​ប្រគល់​ខ្លួន​ឲ្យ​​គម្រោង​ស្រាវជ្រាវ​សម្ងាត់​ពិសេស​កែប្រែ​រូបកាយ​របស់​គាត់​ឲ្យ​មាំមួន ។ វេជ្ជបណ្ឌិត​ស្រាវជ្រាវ​នេះ ត្រូវ​បាន​​​បាញ់​សម្លាប់​ភ្លាមៗ​​ក្នុង​ពេល​នោះ​ដោយ​ភ្នាក់ងារ​របស់​មេ​ដឹកនាំ​​ដេប៉ាតឺម៉ង់​ស្រាវជ្រាវ​​សម្ងាត់ អ៊ីដ្រា (HYDRA) របស់​ណាស៊ី​អាល្លឺម៉ង់ ដែល​មាន​ក្បាល​ក្រហម ហើយ Rogers ត្រូវ​បាន​​គេ​ប្រើ​ឲ្យ​ធ្វើ​ជា​អ្នក​ឃោសនា​ក្នុង​គ្រា​ដំបូងៗ​នោះ ។ លុះ​​ពួកម៉ាក​របស់​គាត់​ត្រូវការ​ឲ្យ​គាត់​ជួយ គាត់​បាន​ធ្វើ​ដំណើរ​ផ្សង​គ្រោះថ្នាក់​​ និង​ត្រឡប់​មក​វិញ​ជាមួយ​ភាពជោគជ័យ ដែល​ធ្វើ​ឲ្យ​គាត់​ក្លាយ​ជា​មេ​បញ្ជាការ​អាមេរិក ធ្វើ​សង្គ្រាម​ប្រឆាំង​នឹង​​ Schmidt, ប្រធាន​ដេប៉ាតឺម៉ង់​ស្រាវជ្រាវ​សម្ងាត់ អ៊ីដ្រា ដែល​មាន​ក្បាល​ក្រហម​នោះ ។

​ទៅ​មើល​កុន​រឿង អ៊ូសៀ ល្ងាច​នេះ ថ្ងៃ​ព្រហស្បតិ៍ ទី 4 ខែសីហា 2011

Posted by ទឹម បឿន in ខ្សែ​ភាពយន្ត, ទាក់ទង​នឹង​ខ្ញុំ.
11 comments

បន្ទាប់​ពី​មាន​រោង​ភាពយន្ត​ខ្នាត​អន្តរជាតិ The Legend បាន​បើក​ដំណើរការ​​ប្រហែល​មួយ​ខែ​កន្លង​មក​,  រោង​ភាពយន្ត​ខ្នាត​អន្តរជាតិ​មួយ​ទៀត​​ឈ្មោះ The Cineplex ក៏​ចាប់ផ្ដើម​​បើក​​បញ្ចាំង​ផង​ដែរ គឺ​បើក​សម្ពោធ​នៅ​ល្ងាច​ថ្ងៃ​ទី ៤ សីហា នេះ ។ រឿង​ដែល​ដាក់​បញ្ចាំង​ដំបូង មាន​​រឿង អ៊ូសៀ (Wuxia)  និង​រឿង Captain America

ខ្ញុំ​​ពីរ​នាក់​ប្រពន្ធ​បាន​គ្រោង​ទៅ​មើល​រឿង អ៊ូសៀ នៅ​ម៉ោង ៩,៣០ នាទី ល្ងាច​នេះ ដែល​មាន​ទីតាំង​នៅ​ផ្សារ​ទំនើប​ សុរិយា ជាន់​ទី ៥ ។

សាច់រឿង​សង្ខេប

Liu Jin Xi (Donnie Yen) ឬ​យើង​ហៅ​ថា កុំកុំ ជា​ម្ចាស់​ហាង​​កំណាត់​សំពត់ រស់នៅ​ជាមួយ​ប្រពន្ធ​ (Tang Wei) រួមទាំង​កូន​ពីរនាក់ ។ ថ្ងៃមួយ មាន​ចោរ​ចូល​មក​ប្លន់​ហាង​លក់​កំណាត់​សំពត់​របស់​គាត់, ដើម្បី​ការពារ​ហាង​​ គាត់​​សម្លាប់​ចោរ​ពីរ​នាក់ ។ អ្នក​ស៊ើបអង្កេត (Takeshi Kaneshiro) ចុះ​មក​តាមដាន​រឿង​នេះ និង​មាន​ព្រឹត្តិការណ៍​ប្រយុទ្ធ​គ្នា​យ៉ាង​កក្រើក​ភូមិ​ដើម្បី​វែកមុខ​ឃាតក… ។

Facebook: facebook.com/SabayCineplex

តាមដាន

Get every new post delivered to your Inbox.

Join 227 other followers

%d bloggers like this: