តាមដាន​ប្លក​ជាមួយ Google Reader


Google Reader ជា​សេវាកម្ម​មួយ​របស់ Google ដែល​អនុញ្ញាត​ឱ្យអ្នក​ធ្វើការ​តាមដាន​រាល់​អត្ថបទ Blog Feed របស់​ប្លក​នានា ។ អ្នក​អាច​ប្រើ Google Reader តាម​​អាសយដ្ឋាន http://google.com/reader ដោយ​ប្រើ​គណនី​របស់ Gmail ។ បើ​អ្នក​មិន​ទាន់​មាន​គណនី​របស់ Gmail សូម​ចុះឈ្មោះ​នៅ http://mail.google.com/mail/signup

ត្រង់ Add a subscription សម្រាប់​ដាក់​បន្ថែម​ប្លក​ដែល​អ្នក​ចង់​តាមដាន និង Folder settings… នៅ​​ប្លុក​ខាងស្ដាំ សម្រាប់​រៀបចំ ឬ កំណត់ Folder ឱ្យ Blog Feed ។

ប្រធានបទ​ប្រចាំ​ថ្ងៃ​សម្រាប់​សរសេរ​ប្លក


ប្រសិន​បើ​អ្នក​សរសេរ​ប្លក ហើយ​រក​​ប្រធាន​បទ​មក​សរសេរ​​ប្រចាំ​ថ្ងៃ​មិន​បាន, ប្លក The Daily Post អាច​ជួយ​អ្នក​បាន ។ ប្លក​នេះ លើក​ទឹកចិត្ត​ឱ្យ​អ្នក​ប្លក​សរសេរ​ប្លក​របស់​ខ្លួន​ជារៀងរាល់​ថ្ងៃ ដោយ​បាន​ផ្ដល់​ប្រធាន​បទ​ និង គំនិត​​ឱ្យ​អ្នក​​រើស​មក​សរសេរ​​តាម​រយៈ​ប្រកាស​នៅ​ទីនោះ ។ អ្វី​ដែល​ខ្ញុំ​ចាប់អារម្មណ៍​ខ្លាំង​មួយ​ទៀត ក្រោម​ប្រធានបទ មាន​ដាក់​ចំនួន​ថ្ងៃ​ដែល​នៅ​សល់​​សម្រាប់​សរសេរ​ប្លក​ក្នុង​ឆ្នាំ ២០១១ នេះ ។

ពុម្អអក្សរ​ខ្មែរ​​បាន​ដាក់​បញ្ចូល​ទៅ Google Font API


លោក ដាញ់ ហុង បាន​ដាក់​បញ្ចូល​ពុម្ព​អក្សរ​ខ្មែរ​ឈ្មោះ Hanuman (ហនុមាន) ចូល​ទៅ Google Font API ដែល​អាច​ប្រើ​ក្នុង​ការសរសេរ​វែបសាយ ដោយ​ពុំ​ចាំ​បាច់​មាន​ពុម្ពអក្សរ​នេះ​ក្នុង​ម៉ាស៊ីន ​និង​​​អាច​បង្ហាញ​ពុម្ពអក្សរ​នេះ​​បាន ។

សូម​ចូល​ទៅ​តំណ​នេះ http://code.google.com/webfonts?subset=khmer

របៀប​ប្រើ គ្រាន់តែ​ដាក់​កូដ​នេះ​ចូល​នៅ​ចន្លោះ tag <head>

<link href='http://fonts.googleapis.com/css?family=<strong>Hanuman&subset=khmer</strong>' rel='stylesheet' type='text/css'>

នៅ​ក្នុង css ដាក់

h1 { font-family: 'Hanuman', arial, serif; }

សូម​មើល​ឧទារហរណ៍​ទាំងមូល​ខាងក្រោម

<html>
 <head>
 <link href='http://fonts.googleapis.com/css?family=Hanuman&subset=khmer' rel='stylesheet' type='text/css'>
 <style>
 body {
 font-family: 'Hanuman', arial, serif;
 font-size: 48px;
 }
 </style>
 </head>
 <body>
 <p>ខ្ញុំ​គ្មាន​ពុម្ព​អក្សរ​នេះ ប៉ុន្តែ​ខ្ញុំ​អាច​អាន​ពុម្ព​អក្សរ​នេះ​បាន</p>
 </body>
</html>

វិបសាយ ខ្ញុំ​ស្រឡាញ់​ខ្មែរ ប្ដូរ​រូបរាង​ថ្មី


រូបភាព​ខាងក្រោម​ជា​រូបរាង​ថ្មី​របស់​វិបសាយ ខ្ញុំ​ស្រឡាញ់​ខ្មែរ

ilovekhmer

http://ilovekhmer.org

ចំណែក​ខាងក្រោម​ជា​រូបរាង​ចាស់

ilovekhmer_old

ខ្ញុំ​ស្រឡាញ់​រូបរាង​ថ្មី​ជាង​រូបរាង​ចាស់ ពិសេស​ឡូហ្គោ​ថ្មី :D

ចំណុច​គួរ​យកចិត្តទុកដាក់​លើ​វិគីភីឌាខ្មែរ


ទាក់ទង​ទៅ​នឹង​អត្ថបទ​មុន​ដែល​អ្នក​អភិបាល​វិគីភីឌា​ឈ្មោះ​កៀនស្វាយ និង​គឹមស្រុន​លុប​អត្ថបទ​មួយ​ចំនួន​នោះ ខ្ញុំ​ក៏​សូម​អរគុណ​នឹង​អ្នក​ទាំង​ពីរ​ដែល​បាន​មក​បកស្រាយ។

ដំណើររឿង​ដែល​ខ្ញុំ​ចង់​រំឭក

ដំបូង​ឡើយ​ពេល​ដែល​ខ្ញុំ​ចូល​ទៅ​វិគីភីឌា​និង​បាន​ដាក់​អត្ថបទ​របស់​ខ្ញុំ ខ្ញុំ​បាន​ជួប​លោក Jose77 គាត់​បាន​តែងតាំង​ខ្ញុំ​ជា Sysop បានន័យ​ថា​ជា​អ្នក​ដែល​មាន​សិទ្ធិ​កែប្រែ​មួយ​នៅ​វិគីភីឌា​ដែរ។ តែ​ខ្ញុំ​ក៏​មិន​បាន​ដាក់​អត្ថបទ​ច្រើន​ដែរ ដោយ​គ្រាន់​តែ​ស្រាវជ្រាវ​ឲ្យ​ដឹង​ពី​របៀប​សរសេរ និង​កែ​ទម្រង់​ផ្សេងៗ​របស់​អត្ថបទ​នៅ​វិគីភីឌា​នោះ។ លុះ​​ក្រោយ​មក សុភ័ក្ត្រ​ចូលរួម​​ដែរ។ អត្ថបទ​មួយ​ចំនួន​បាន​ដាក់ និង​អត្ថបទ​មួយ​ចំនួន​កំពុង​បកប្រែ។ ថ្ងៃ​មួយ​អត្ថបទ​អំពី​នាយករដ្ឋមន្ត្រី​ហ៊ុន សែន ត្រូវ​បាន​លុប។ ពេល​នោះ​សុភ័ក្ត្រ​ប្រាប់​ខ្ញុំ​ដែរ ហើយ​ខ្ញុំ​ក៏​សង្គ្រោះ​អត្ថបទ​នោះ​មក​វិញ។ ក្រោយ​មក​ដោយសារ​រវល់​ផង ខ្ញុំ​មិន​បាន​សួរនាំ​ពី​រឿង​នេះ​ទេ រហូត​មក​ដល់​ម៉ុន្មាន​ថ្ងៃ​មុន​នេះ ពេល​ដែល​ខ្ញុំ​ត្រូវការ​មើល​អត្ថបទ​ដែល​សុភ័ក្ត្រ​បកប្រែ​នោះ ខ្ញុំ​ក៏​បាន​ឃើញ​អ្នក​ប្រើ​ឈ្មោះ កៀនស្វាយ លុប​នោះ។ គំនិត​របស់​ខ្ញុំ​យល់​ថា វិគីភីឌា អានាធិប្បតេយ្យ​ណាស់ នរណា​ចង់​លុប​ក៏​បាន។ អ្នកណា​ចង់​ដាក់​ក៏​បាន។ ដូច្នេះ​គួរ​តែ​លើក​យក​មក​និយាយ​ដើម្បី​ឲ្យ​បាន​ដឹង និង​យល់​ទាំង​អស់​គ្នា ដោយ​មិន​សង្ឃឹម​ថា​អាច​មាន​ដំណោះស្រាយ​ណា​មួយ​ឡើយ។ ផ្ទុយ​ទៅ​វិញ អ្នក​លុប កៀនស្វាយ និង គឹមស្រ៊ុន បាន​មក​បកស្រាយ​ពី​មូលហេតុ ដែល​ធ្វើ​ឲ្យ​ខ្ញុំ​ដឹង​ថា អ្នក​ដែល​ចូលរួម​ជា​អភិបាល និង​បកប្រែ​គឺ​អ្នក​ទាំង​នោះ។ នេះ​ជា​រឿង​ល្អ ដែល​យើង​បាន​ស្គាល់ និង​ស្ដាប់​យោបល់​អ្នក​ទាំង​នោះ។

អ្វី​ដែល​អ្នកប្រើ និង​អ្នក​អភិបាល​វិគីភីឌា​គួរ​​ចាប់​អារម្មណ៍?

១. ការបកប្រែ និង​ដាក់​អត្ថបទ

សូម​ប្រយ័ត្ន​ចំពោះ​អក្ខរាវិរុទ្ធ និង​ពាក្យ​ដែល​ត្រូវ​ប្រើ ដោយ​ផ្ទៀងផ្ទាត់​នឹង​វចនានុក្រម​សម្ដេច​ព្រះសង្ឃរាជ ជួន ណាត ព្រោះ​ឃើញ​មាន​ការធ្វេសប្រហែស​នឹង​អក្ខរាវិរុទ្ធ និង​ការប្រើ​ពាក្យ​ច្រើន​ដែរ។

សរសេរ​ឲ្យ​មាន​លក្ខណៈ​ត្រឹមត្រូវ​តាម​ស្តងដារ​យូនីកូដ​ខ្មែរ។ របៀប​សរសេរ ត្រូវ​កាត់​​មួយ​ពាក្យៗ​ដោយ​ប្រើ Space bar និង​ដកឃ្លា​ប្រយោគ​ឲ្យ​បាន​ត្រឹមត្រូវ​ដោយ​ប្រើ Shift + Space bar ដើម្បី​ឲ្យ​អក្សរ​បង្ហាញ​ស្អាត និង​ងាយស្រួល​ក្នុង​ការរក​អត្ថបទ​នោះ​។ បច្ចប្បន្ន អត្ថបទ​ដែល​ដាក់​រួច​ជា​ច្រើន​​មិន​ប្រើ​វិធី​នេះ សំខាន់​បំផុត​ចំណងជើង។ ចំណែក​ការវាយ​អក្សរ ត្រូវ​វាយ​តាម​លំដាប់​នៃ​ការប្រកប​របស់​ខ្មែរ​ឲ្យ​បាន​ត្រឹមត្រូវ ដូច​ជា​ពាក្យ បញ្ជ្រៀត សរសេរ និង​ប្រកប ប និង​ញ ជើង​ជ ជើង​រ ដាក់​ស្រៈ​អៀ និង​ត កុំ​សរសេរ​ជើង​រ មុន​ជើង​ជ ជា​ដើម។

២. ការ​កែប្រែ ឬ​លុប

ត្រូវ​រៀបចំ​គោលការណ៍​ឲ្យ​បាន​ច្បាស់លាស់ និង​ជូន​ដំណឹង​ដល់​សមាជិក​ឲ្យ​បាន​ដឹង។

សូម​កុំ​ផ្អែក​លើ​តែ​ការបោះឆ្នោត​តែ​មួយ​មុខ ចំពោះ​ការលុប​អត្ថបទ​នោះ។ ត្រូវ​មើល​លើ​​ប្រយោជន៍​របស់​វា អត្ថន័យ ឬ​ខ្លឹមសារ ដើម្បី​វាយ​តម្លៃ​ថា​គួរ​លុប ឬ​មិន​លុប។ ករណី​ត្រូវ​លុប ត្រូវ​ជូន​ដំណឹង និង​ផ្ដល់​សិទ្ធិ​ឲ្យ​ម្ចាស់​អត្ថបទពិភាក្សា​ជាមួយ​យើង ថា​តើ​គាត់​គួរ​កែប្រែ ឬ​យើង​ត្រូវ​ទទួល​យក​របស់​គាត់។

ថ្វី​បើ​អ្នក​អភិបាល និង​សមាជិក​ទាំង​ឡាយ​មាន​កន្លែង​ពិភាក្សា​គ្រប់គ្នា​ក៏​ពិត​មែន តែ​សមាជិក​ខ្លះ ដូច​ជា​អ្នក​ចូល​ថ្មី មិន​ដឹង​ថា​អ្នក​ណា​ជា​អភិបាល ឬ​ទាក់ទង​អ្នក​ណា ពេល​ជួប​បញ្ហា ឬ​អត្ថបទ​ត្រូវ​គេ​លុប​បាត់។ ត្រង់​នេះ ពេល​ខ្លះ អ្នក​ដែល​ដាក់​អត្ថបទ​នោះ ដាក់​រួច​ហើយ មិន​បាន​ចូល​ទៅ​មើល​អត្ថបទ​របស់​ខ្លួន​ក្នុង​រយៈពេល​យូរ​។ ករណី​នេះ ក៏​គួរ​មាន​ដំណោះស្រាយ​ផង​ដែរ។

ត្រូវ​មាន​វិធី​ដោះស្រាយ​ប្រសិន​បើ​អ្នកប្រើ​អាណាមិក​ណា​មក​លុប​អត្ថបទ។ បើ​មាន​អ្នក​ខូចខិល​ណា​មក​ដើរ​លុប ១០, ២០​អត្ថបទ​លេង អភិបាល​ត្រូវ​ដោះស្រាយ​យ៉ាងណា? សង្គ្រោះ​មក​វិញ​ឬ​មាន​វិធី​ផ្សេង​សម្រាប់​ទប់ស្កាត់។

ខាងលើ​ជា​ករណី​មួយ​ចំនួន​ដែល​ខ្ញុំ​ជួប​ប្រទះ​នៅ​វិគីភីឌាខ្មែរ។ ឥឡូវ​យើង​ដឹង​ថា​អ្នកណា​ជា​អ្នក​អភិបាល​នៅ​វិគីភីឌា ដែល​អាច​ទាក់ទង​ពេល​មាន​បញ្ហា និង​ជា​អ្នក​ដែល​មើល​គ្រប់គ្រង​អត្ថបទ​ដែល​ដាក់​រួច។

គ្រប់គ្នា នរណា​ក៏​ចង់​ឲ្យ​ជាតិ ឲ្យ​អក្សរសាស្ត្រ​រីកចម្រើន ក៏​ដូច​ជា​ចង់​ឲ្យ​មាន​ឯកសារ​សម្បូរ​បែប​សម្រាប់​ស្រាវជ្រាវ។ ប្រសិនបើ​វិគីភីឌី ជា​ឃ្លាំង​ឯកសារ ហើយ​គេ​ទុកចិត្ត​ថា​គេ​ក៏​អាច​ទុក​ដាក់​ឯកសារ​មាន​ប្រយោជន៍​សម្រាប់​អ្នក​ដ៏ទៃ​ដែរ​នោះ គ្រប់គ្នា​នឹង​ចំណាយពេល​របស់​គេ​ធ្វើ​ការងារ​មាន​ប្រយោជន៍​នេះ​មិន​ខាន។ ចំណែក​ខ្ញុំ​នៅ​តែ​បន្ត​ដាក់​អត្ថបទ​ផ្សេងៗ​ទៀត​តាម​ដែល​អាច​ធ្វើ​ទៅ​បាន។

យ៉ាងណា​ក៏​សុំ​អរគុណ​ដល់​អភិបាល​ទាំង​៥​នាក់​ដែល​ចំណាយ​ពេល​លើ​ការងារ​នេះ និង​អរគុណ​ដល់​គឹមស្រ៊ុន ដែល​បាន​សង្គ្រោះ​អត្ថបទ​ដែល​សុភ័ក្ត្រ​ដាក់​មក​វិញ ហើយ​ខ្ញុំ​ក៏​សង្ឃឹម​ថា​ សុភ័ក្ត្រ​នឹង​ជួយ​ដល់​ការងារ​នេះ​បន្ត​ទៀត។

** អត្ថបទ​មុន និង​អត្ថបទ​នេះ ខ្ញុំ​សរសេរ​ពាក្យ​ពីរ​ខុស​គ្នា​ដែល​សំដៅ​ន័យ​តែ​មួយ។ អត្ថបទ​មុន​ខ្ញុំ​សរសេរ វិគីផេឌ្យា និង​អត្ថបទ​នេះ ខ្ញុំ​សរសេរ វិគីភីឌា។ ពាក្យ​ទាំង​ពីរ​នេះ នៅ​មិន​ទាន់​ប្រើ​ជា​ផ្លូវការ​នៅ​ឡើយ ប៉ុន្តែ វិគីភីឌា ត្រូវ​បាន​ប្រើ​ជា​ឈ្មោះ​នៅ​លើ​វិបសាយ វិគីភីឌា​នេះ​រួច​ទៅ​ហើយ។ អាច​នឹង​មាន​ការផ្លាស់ប្ដូរ​ការសរសេរ​នៅ​ពេល​ក្រោយ​ទៀត​តាម​អក្សរ​ណា​ដែល​គេ​ប្រើ​ច្រើន។

អត្ថបទ​ទាក់ទង៖
វិគីផេឌ្យា​ខ្មែរ​មិន​សេរី​ដូច​ដែល​អ្នក​គិត

សុវត្ថិភាព​ឯកសារ


កន្លង​មក ខ្ញុំ​ជឿ​ថា​លោកអ្នក​មិន​សូវ​ខ្វាយខ្វល់​រឿង​បាត់​ឯកសារ​ប៉ុន្មាន​ទេ ព្រោះ​វា​កម្រ​ណាស់​ដែល​ហាតឌីស​កុំព្យូទ័រ​ខូច​ហើយ​បាត់​ឯកសារ​ទាំង​អស់​នោះ។ តែ​ពេល​ខ្លះ​ក៏​លោក​អ្នក​ក៏​អាច​ជួប​បញ្ហា​នេះ​ដោយ​ចៃដន្យ​ផង​ដែរ។ ដូច​មិត្រ​ខ្ញុំ​ម្នាក់​បាត់បង់​ឯកសារ​ទាំង​អស់ ដោយសារ​ហាតឌីស​ខូច​រហូត​សង្គ្រោះ​លែង​បាន។ ដូច្នេះ​លោកអ្នក​ក៏​គួរ​យកចិត្ត​ទុកដាក់​ដែរ ប្រសិន​បើ​ឯកសារ​របស់​លោកអ្នក​ជា​ឯកសារ​សំខាន់។

ថ្មីៗ​នេះ ខ្ញុំ​បាន​ឃើញ​វិបសាយ​មួយ​ដែល​អាច​ទុកចិត្ត​បាន​ក្នុង​ការជួយ​យើង​រក្សា​ទុក​ឯកសារ​។ ដោយសារ​វិបសាយ​នេះ​មាន​កម្មវិធី​ដែល​អាច​ដំឡើង​លើ​វិនដូស៍​ និង​ចាត់ចែង​ឯកសារ​លើ​វិនដូស៍​ផ្ទាល់​ដោយ​មិន​បាច់​ចូល​ទៅ​អាប់ឡូត​តាម​វិបសាយ វា​ពិត​ជា​ងាយស្រួល​ណាស់។

ឯកសារ​ដែល​លោកអ្នក​ចង់​ទុក​នៅ​លើ​វិបសាយ​នោះ លោកអ្នក​គ្រាន់​តែ​ថត​វា​​យក​ដាក់​ក្នុង​ហ្វូលឌឺ​ដែល​កម្មវិធី​នោះ​បង្កើត​ស្រាប់​​លើ​កុំព្យូទ័រ ដូច​ប្រើ​លើ​វិនដូស៍​អ៊ិចផ្លរឺ​ធម្មតា។ មិន​តែ​ប៉ុណ្ណោះ លោក​អ្នក​អាច​ឲ្យ​គេ​ដោនឡូត​ឯកសារ​នោះ​បាន​ទៀត​ផង ដោយ​គ្រាន់តែ​ចុច​ប៊ូតុង​ខាងស្ដាំ​របស់​ម៉ៅស៍ និង​ចម្លង​តំណ​សម្រាប់​ឲ្យ​គេ​ដោនឡូត​បាន។ ត្រង់​នេះ​ជា​ចំណាប់​អារម្មណ៍​របស់​ខ្ញុំ​ណាស់។ ពេល​ខ្លះ​ខ្ញុំ​ចង់​ដាក់​ឯកសារ​ឲ្យ​គេ​ដោនឡូត​ វា​ជា​វិធី​ងាយ និង​ឆាប់​រហ័ស។

លក្ខណៈ​ពិសេស​ដែល​គួរ​ឲ្យ​ទុកចិត្ត​បាន​នោះ គឺ​នៅ​ពេល​ដែល​យើង​ថត​ឯកសារ​ដាក់​ចូល​ទៅ វា​នឹង​ធ្វើ​ការ​ខ្ចប់ (encrypt) ​ដើម្បី​សុវត្ថិភាព​​ស្រាប់។

dropbox

ទោះ​ជា​កុំព្យូទ័រ​របស់​លោកអ្នក​ខូច ឬ​លោក​អ្នក​នៅ​ទី​ណា​ក៏​ដោយ លោក​អ្នក​ក៏​អាច​ចូល​ទៅ​កាន់​វិបសាយ​នោះ​យក​ឯកសារ​មក​ប្រើ​បាន​ដែរ។

ដោនឡូត និង​សាកល្បង​ពី​វិបសាយ getdropbox.com

មើល​ទីតាំង​ការិយាល័យ​បោះឆ្នោត​របស់​អ្នក​តាម​អ៊ីនធឺណិត


បងប្អូន​ដែល​នៅ​ឆ្ងាយៗ​ពី​ស្រុកភូមិ ឬ​ឆ្ងាយ​ពី​ទីតាំង​ការិយាល័យ​បោះឆ្នោត មិន​បាច់​ចំណាយពេល​ទៅ​រក​មើល​ទីតាំង​នៅ​តាម​ការិយាល័យ​បោះឆ្នោត​ក៏​បាន។ សូម​ចូល​មើល​នៅ​វិបសាយ បញ្ជី​ឈ្មោះ​​អ្នក​បោះឆ្នោត​ឆ្នាំ​២០០៨ របស់​គណៈកម្មាធិការ​ជាតិ​រៀបចំ​ការបោះឆ្នោត។